من أروع القصائد التي أعجبتني بهذا المجلس للشاعر الكبير زياد بن حجاب

من أروع القصائد التي أعجبتني بهذا المجلس للشاعر الكبير زياد بن حجاب ألقاها أمام صاحب السمو الملكي الأمير سلطان رحمه الله في حفل تخرج . يقول فيها:

وقفت الموقف اللي واجبه ما يقبل التأخير

وانا صابر على شانك الى سبعة عشر شعبان

سلمت ودمت يا من له نكن الحب والتقدير

عسى ربي يديمك يا حبيب الجيش يا سلطان

وجودك يجعل الشاعر يجود ويحسن التعبير

مدامك تستمع له تنفتح لابداعه البيبان

وانا ماني بـمفتي عام جيش المملكة يا مير

انا جندي من جنود الوطن وسـلاحي الإيمان

درست الفقة والتوحيد والتجويد والتفسير

وكتب المكتبات اللي كتب فيها عن القرآن

ولا والله لقيت الكلمة اللي تدعم التفجير

وقتل الابريا والزج بالاطفال والنسوان

انا يا امير مسلم منهجي ما يقبل التغيير

ولا لي دين ثاني يقبل الارهاب والعدوان

انا ثابت عقيده ما التفت للكذب والتزوير

ولا تغريني الفتنه ولا تجذبني الالوان

انا جندي سعودي مسلم وطبعي احب الخير

واتعب لا شعرت اني شبعت وشفت احد جوعان

لي اخوان بفلسطين وجنوب افريقيا وكشمير

ولي باسبانيا والمانيا والهند واليابان

صحيح انا بعيد ونختلف باللبس والتصوير

ولكنّا مثل وضع الجسد وقت اللزوم اخوان

تربينا على سيرة بلال ومصعب بن عمير

وابو بكر وعمر وابو الحسين وخالد وعثمان

ابتألم مدام المسجد الاقصى يبي تحرير

وابغضب كل ما شفت المدافع تقصف الشيشان

انا مكه وانا طيبه وانا عرعر وانا الخرخير

وانا جدة وانا حايل وانا بيشة وانا نجران

ابحمي كل شبر بديرتي واللي يصير يصير

وابطلع للماذن وارتفع وارفع بها الاذان

تطورنا على ايديكم وحافظنا على التطوير

وقدمنا لكم طاعاتنا اللي تنبذ العصيان

ولا نقبل فتاوى أي شخص ولا لها تأثير

اذا ماهي فتاوى من هنا .. من منبع الايمان

وترى بعض اجتهاد الامه يسبب لها التاخير

مثل ما الزود في بعض المسائل يعتبر نقصان

وردي العقل مهما تحذره ما ينفع التحذير

لان العقل للمجنون مثل الشوف للعميان

شف اثار الدمار اللي جنا الارهاب والتدمير

وشف باليوم كم يذبح وكم ينزح من الافغان

حدث ما كان له داعي وغلطة ما لها تبرير

وشف والله اعلم كم نبي ندفع من الاثمان

اجل وشلون غلطة منتحر يدفع ثمنها الغير

مثل حرب الخليج اللي طلع كلٍ بها خسران

زياد حجاب بن نحيت